Санхүүгийн мэдээллийн албаны нэрэмжит “Эрдэм шинжилгээний бага хурал” зохион байгуулагдлаа

Хамтын ажиллагааны зөвлөлийн Судалгаа, дүн шинжилгээний ажлын хэсгийн хүрээнд Санхүүгийн мэдээллийн албанаас 2025 оны 6 дугаар сарын 04-ний өдөр мөнгө угаах болон терроризмыг санхүүжүүлэхтэй тэмцэх чиглэлээр “Эрдэм шинжилгээний бага хурал”-ыг оюутнуудын дунд дөрөв дэх жилдээ зохион байгууллаа.

Судалгааны сэдвийн хүрээ өмнөх жилүүдтэй харьцуулахад өргөжин тэлж, цахим гэмт хэрэг, типологийн чиг хандлага, шинэ техник технологи, санхүүгийн шинэ хэрэгслүүдэд түлхүү чиглэсэн байв. Энэ удаагийн хурал анх удаа танхим болон цахим хэлбэрийг хослуулан зохион байгуулагдаж, Монгол Улсын их, дээд сургуулиудын оюутнуудаас гадна ОХУ, АНУ-уудаас оюутнууд оролцон илтгэлээ танилцууллаа.

Шүүгчдийн бүрэлдэхүүнд Монголбанкнаас Санхүүгийн мэдээллийн алба, Судалгаа статистикийн газар, Хууль эрх зүйн газар мөн Санхүүгийн зохицуулах хороо, Цагдаагийн ерөнхий газрын Эрүүгийн цагдаагийн албаны төлөөллүүд оролцсон юм.

Эрдэм шинжилгээний хуралд дараах бүтээлүүд шалгарлаа. Үүнд:

Дэд байр:

Н.Эгшиглэн, Б.Мөнхзул, Д.Болорчимэг (СЭЗИС) – “Цахим мөрийтэй тоглоомын хууль эрх зүйн зохицуулалт нь мөнгө угаах эрсдэл, эдийн засгийн тогтвортой байдалд хэрхэн нөлөөлж байна вэ”

Гуравдугаар байр:

Т.Энх-Отгон, О.Оюунсаруул (СЭЗИС) – “Мөнгө угаах гэмт хэргийг илрүүлэхэд мэдээлэх үүрэгтэй зарим этгээдийн комплаенсийн практик үр нөлөөний хязгаарлагдмал байдал, түүний эрх зүйн зохицуулалт”

Тусгай байр:

Б.Номундарь (МУИС) – “Спорт бооцооны тоглоомоор дамжуулан мөнгө угаах эрсдэл: Шийдвэрлэх арга зам”

Э.Тэмүгэ (ОХУ-ын ДХЯ-ны академи) – “Хуулийн этгээдээр дамжуулан мөнгө угаах гэмт хэргийг илрүүлэх, таслан зогсоох нь”

Г.Мишээл, Э.Сугар (СЭЗИС) – “Виртуал хөрөнгийн салбараар дамжуулан мөнгө угаах гэмт хэргийн чиг хандлага, технологийн дэвшлийг ашиглан урьдчилан сэргийлэх арга зам”

Энэ удаагийн хуралд шүүгчдийн үнэлгээгээр тэргүүн байрны шаардлага хангасан бүтээл байгаагүй тул тэргүүн байрыг шалгаруулаагүй бөгөөд дараагийн жилүүдэд илүү чанартай, оновчтой бүтээл туурвих боломжийг оюутнуудад нээлттэй үлдээсэн юм.

Эрдэм шинжилгээний бага хуралд судалгаа ирүүлж, амжилттай оролцсон нийт оюутнууддаа талархал илэрхийлж, сурлагын өндөр амжилт хүсье.