Ази, Номхон далайн мөнгө угаахтай тэмцэх бүлгийн 2025 оны жилийн чуулга уулзалт зохион байгуулагдлаа
Ази, Номхон далайн мөнгө угаахтай тэмцэх бүлэг (АНДМУТБ)-ийн 2025 оны жилийн чуулга уулзалт 2025 оны 8 дугаар сарын 25-ны өдрөөс 29-ний өдрүүдэд Япон улсын Токио хотноо зохион байгуулагдаж, бүс нутгийн 400 гаруй төлөөлөл оролцлоо. Чуулга уулзалтыг Япон Улсын Сангийн сайд ноён Кацунобу Като нээж, АНДМУТБ-ийн хамтран даргалагч ноён Мицүтоши (Тоши) Кажикава болон Иан Маккартни нар удирдан явуулав.
Тус уулзалтад Монгол Улсыг төлөөлөн Мөнгө угаах, терроризмыг санхүүжүүлэхтэй тэмцэх Хамтын ажиллагааны зөвлөлийн дарга бөгөөд Санхүүгийн зохицуулах хорооны дэд дарга Н.Хүдэрчулуун болон Санхүүгийн мэдээллийн албаны дарга Б.Батбаатараар ахлуулсан, Монголбанк, Санхүүгийн мэдээллийн алба, Нийслэлийн эрүүгийн хэргийн давж заалдах шатны шүүх, Шүүхийн сургалт, судалгаа, мэдээллийн академи, Тагнуулын ерөнхий газар, Цагдаагийн ерөнхий газар, Авлигатай тэмцэх газар, Терроризмтой тэмцэх зөвлөл, Улсын ерөнхий прокурорын газар, Улсын бүртгэлийн ерөнхий газрын төлөөллүүд оролцов.
Чуулга уулзалтын үеэр мөнгө угаах, терроризмыг санхүүжүүлэх, үй олноор хөнөөх зэвсэг дэлгэрүүлэхийг санхүүжүүлэх эдийн засгийн гэмт хэрэгтэй тэмцэх хамтын ажиллагаа, уялдаа холбоо, үр дүнтэй байдлыг сайжруулах чиглэлээр олон асуудлыг хэлэлцэж, шийдвэрүүд гаргав. Тухайлбал АНДМУТБ-ийн гишүүнчлэлийн асуудал, мэдээлэл, харилцааны протокол батлах, дэлхий нийтийн 5 дахь шатны харилцан үнэлгээнд зориулан АНДМУТБ-ийн ажлын албанд гишүүн улсуудаас томилон ажиллуулах талаар шийдвэрүүдийг гаргав. Мөн Малдив болон Ниуэ улсын Харилцан үнэлгээний тайлан, Мянмар, Вьетнам улсуудын Явцын тайланг тус тус хэлэлцэн баталлаа. Чуулга уулзалтын үеэр дэлхий нийтийн 5 дахь шатны харилцан үнэлгээний амжилтын хүчин зүйлс, олон талт байдал, оролцоог хангах тухай панел хэлэлцүүлгүүд зохион байгуулагдав. Түүнчлэн 2025 оны 8 дугаар сарын 26-ны өдөр зохион байгуулагдсан виртуал хөрөнгө, виртуал хөрөнгийн үйлчилгээ үзүүлэгчдийн техникийн семинарын үеэр Санхүүгийн зохицуулах хорооны төлөөлөл “Виртуал хөрөнгийн үйлчилгээ үзүүлэгчдэд тавих хяналт: Хүндрэл бэрхшээл ба сургамж” сэдвээр Монгол Улсын зохицуулалтын туршлагаас хуваалцан, панелистаар оролцов.