Санхүүгийн мэдээллийн албаны дарга олон улсад туршлага хуваалцав

Ази, Номхон далайн мөнгө угаахтай тэмцэх бүлгийн 2025 оны жилийн чуулга уулзалтын эхний өдөр “Харилцан үнэлгээнд амжилттай үр дүн үзүүлэхэд МУТСТ манлайллын ач холбогдол” сэдэвт хэлэлцүүлэг зохион байгуулагдлаа. ФАТФ-ийн Ерөнхийлөгч хатагтай Элиза де Анда Мадразо хэлэлцүүлгийг нээж үг хэлсэн бөгөөд бүсүүдийн хэмжээнд санаачлан хийж буй ажлуудыг АНДМУТБ-ийн нарийн бичгийн дарга, Ойрхи Дорнод ба Хойд Африкийн бүс нутгийн байгууллагын төлөөллүүд танилцуулав. Үүний дараа улс орны хэмжээнд хийж буй ажлуудын талаар Филиппин, Монгол, Арабын Нэгдсэн Эмират улс, Шри Ланка, Малайз улс танилцуулав. Монгол улсаас  Санхүүгийн мэдээллийн албаны дарга Б.Батбаатар энэхүү хэлэлцүүлэгт панелистаар оролцон, 2019 онд саарал жагсаалтад орж, богино хугацаанд гарсан туршлагаас хуваалцлаа.